गढीमा भेटिएको सालकलाई रानी वनमा छोडियो
हेटौंडा- किसानको साथीको परिचय बनाएको सालक मकवानपुर गढी गाउँपालिका–३ मा भेटिएको छ । दुर्लभ तथा लोपोन्मुख तामे सालक (इन्डियन प्या·ोलिन) बच्चासहित फेलापरेको हो ।स्थानीय मनिष देवकोटाले करिब १२ किलो तौलको माउ सालक र ३ किलोको बच्चासहित फेला पारेर इलाका प्रहरी कार्यालय मकवानपुरगढीमा बुझाएका थिए । प्रहरीमार्फत सालकलाई रानी सामुदायिक वन उपभोक्ता समूहद्वारा ब्लक नं. ६ मा निर्माण गरिएको सालक केजमा सुरक्षितरुपमा छाडिएको छ । सालकलाई हेटौंडा–६ का वडाअध्यक्ष विष्णुबहादुर दाहाल, वडासदस्य विजय पौडेल, सव डिभिजन वन कार्यालय, हेटौंडाका वनअधिकृत बच्चुराम सुवेदी, सामुदायिक वन उपभोक्ता महासंघ मकवानपुरका अध्यक्ष साधुराम चौलागाई, रानी सामुदायिक वनका अध्यक्ष केशव धिताल लगायतको रोहवरमा छाडिएको हो ।
रानी सामुदायिक वनले २०६२ सालदेखि सालकको संरक्षण गर्दै आएको छ । समूहले सालकको बारेमा जनचेतनामूलक कार्यक्रम, तालिम गोष्ठी, विद्यालयस्तरीय कार्यक्रम, साललको मूर्ति स्थापना, होडिङ बोर्ड निर्माण लगायतका कार्यक्रम सञ्चालन गर्दै आएको छ । समूहद्वारा संरक्षित वनमा करिव ५ दर्जन सालक रहेको अनुमान समूहले गरेको छ । संसारभर पाइने आठ प्रजातिका सालकमध्ये मकवानपुरक्षेत्रमा कालो सालक (चाइनिज प्या·ोलिन) र तामे सालक (इन्डियन प्या·ोलिन) पाइन्छन् ।
मकवानपुरका करिब चार सय सामुदायिक वनमध्ये एक सयमा सालक देखिने गरिएको छ । चुच्चेखोला र रानी सामुदायिक वनले सालक संरक्षणका लागि चोरीसिकारी तथा तस्करी रोक्ने अभियान सञ्चालन गर्दै आएका छन् । शान्त र लजालु स्वभावको स्तनधारी जनावर सालकले माटो खुकुलो बनाउने र बालीलाई हानिनोक्सानी नगर्ने भएकाले किसानमैत्री वन्यजन्तुका रुपमा चिनिन्छ । राष्ट्रिय निकुञ्ज तथा वन्यजन्तु संरक्षण ऐन, २०२९ अनुसार सालक संरक्षित वन्यजन्तु हो ।
ऐनअनुसार सालकको शिकार, खरिद बिक्री वा ओसारपसार गर्नेलाई पाँच लाखदेखि १० लाख रुपैयाँसम्म जरिबाना वा पाँचदेखि १५ वर्षसम्म कैद वा दुवै सजाय हुने व्यवस्था छ । सालक मारेमा वा खाएमा १० वर्षसम्म कैद वा १० लाख रुपैयाँसम्म जरिबाना वा दुवै सजाय हुने प्रावधान रहेको छ । बागमती प्रदेश सरकारले केही महिना अघि चितवनको माडीमा पहिलो पटक सालक सम्मेलनगरेको थियो ।
