मोवाइल एप डागाची सञ्चालनमा
हेटौंडा-कोरियामा बसोबास गर्ने नेपालीसहित विदेशी नागरिकलाई लक्षित गर्दै विकसित गरिएको एआई आधारित बहुभाषिक मोवाइल एप डागाची सञ्चालनमा आएको छ । लञ्च भएको छोटो समयमै एप ५० हजारभन्दा बढी पटक डाउनलोड भइसकेको डेभलपर टिमले जनाएको छ । शनिबार एपबारे जानकारी दिन आयोजित पत्रकार सम्मेलनमा डेभलपर टिमका सदस्य माधव सापकोटाले भाषागत अवरोधका कारण सूचना प्राप्तिमा देखिँदै आएको समस्या समाधान गर्नु एपको मुख्य उद्देश्य रहेको बताए । डागाची एप विशेषगरी कोरियामा रहेका विदेशी नागरिकका लागि विश्वासिलो सूचनाको स्रोतकारुपमा विकास गरिएको उनको भनाई रहेको छ ।
हाल डागाची एपमार्फत नेपालीसहित १६ भन्दा बढी भाषामा सेवा उपलब्ध छ । एपमा श्रम, भिसा, स्वास्थ्य सेवा, कानुनी प्रक्रिया, विश्वविद्यालय भर्ना, रोजगारी, आवास तथा दैनिकजीवनसँग सम्बन्धित व्यवहारिक जानकारी एआई प्रविधिको सहायताले सरल र बुझिने शैलीमा प्रस्तुत गरिएको बताइएको छ । आपतकालीन अवस्थामा आवश्यक सम्पर्क नम्बर र निर्देशन समेत एपमार्फत प्राप्त गर्न सकिने व्यवस्था गरिएको छ । डेभलपर सापकोटाका अनुसार कोरियामा अध्ययन, रोजगारी वा अन्य प्रयोजनका लागि जाने विद्यार्थी तथा नवआगन्तुकका लागि यो एप विशेष उपयोगी हुनेछ । एपले नेपालको पर्यटन उद्योगलाई प्रवद्र्धन गर्न महत्वपूर्ण भूमिका खेल्ने विश्वास लिइएको छ ।
डागाची एपलाई केवल सूचना दिने माध्यममा सीमित नराखी विदेशी नागरिकका लागि दीर्घकालीन डिजिटल सहायककारुपमा विकास गर्ने लक्ष्य रहेको टिमले जनाएको छ । नेपालमा रहेका विदेशी नागरिकले पनि नेपालको समाज, सेवा, स्वास्थ्य, कानुन तथा आर्थिक गतिविधिबारे आफ्नै मातृभाषामा जानकारी लिनसक्ने गरी एप विस्तार गरिएको बताइएको छ । डागाची एपमार्फत उद्यमशील नेपालीले आफ्ना सेवा, उत्पादन तथा व्यावसायिक अवसरलाई अन्तर्राष्ट्रिय बजारसम्म प्रवद्र्धन गर्न सक्ने अवसर पाउने दाबी गरिएको छ ।
एप विद्यार्थी, सञ्चारकर्मी, पर्यटन व्यवसायी, रोजगारदाता,रोजगारी खोज्ने व्यक्ति तथा सर्वसाधारण सबैका लागि उपयोगी डिजिटल प्लेटफर्मका रुपमा विकास हुँदै गएको डेभलपर टिमको भनाइ छ । आगामी दिनमा थप नयाँ फिचर समावेश गरिने, एमओयू भएका संस्थालाई भेरिफिकेसन ब्याज र सब्सक्रिप्सन सेवा कार्यान्वयनमा ल्याइएको बताइएको छ । सञ्चारकर्मीका लागि कोरियालगायत विभिन्न मुलुकका प्रमुख समाचार र सन्दर्भसामग्री नेपाली भाषामा उपलब्ध गराउने व्यवस्था गरिएको जानकारी पनि दिइएको छ । पत्रकार सम्मेलनमा नेपाल पत्रकार महासंघ बागमती प्रदेश उपाध्यक्ष हरि हुमागाई, जिल्ला अध्यक्ष बालकृष्ण अधिकारीलगायत विभिन्न संचारमाध्यमका पत्रकारको उपस्थित रहेको थियो ।
