कुन्छाल–चित्लाङ सडक स्तरोन्नतिको ठेक्का : पाँच किलोमिटर सडक कालोपत्रे हुने

हेटौंडा- मकवानपुरको पर्यटकीय क्षेत्र चित्लाङलाई काठमाडौँ र अन्य क्षेत्रसँग जोड्ने छोटो दूरीको महत्वपूर्ण कुन्छाल–चित्लाङ सडक बिस्तार गरिने भएको छ । सडक डिभिजन कार्यालय हेटौँडाले यस खण्डको स्तरोन्नतिका लागि ठेक्का आह्वान गरेको छ । यस सडक खण्डको स्तरोन्नतिका लागि डिभिजन कार्यालयले एक सूचना जारी गर्दै सडक सुधार तथा संरचनात्मक निर्माणका लागि बोलपत्र आह्वान गरेको हो । २०६२ सालमा ट्रयाक खनेको यो सडक लामो समयदेखि धुलो र हिलोको सास्ती खेपिरहेका स्थानीय बासिन्दा र पर्यटकका लागि यो आयोजनाले ठूलो राहत दिने अपेक्षा गरिएको छ ।करिब ५ किलोमिटर दूरी रहेको यो सडक २५ करोड लागतमा बिस्तार गरिने भएको सडक डिभिजन कार्यालय हेटौँडाका सूचना अधिकारी एवम् इन्जिनियर यादव सुवेदीले जानकारी दिए ।

सुवेदीका अनुसार यस आयोजनाअन्तर्गत् करिब ५ किलोमिटर सडक खण्डमा कालोपत्रे र आरसीसी ढलान गरिने भएको छ । काठमाडौँको थानकोट–चित्लाङ खण्ड सडक डिभिजन काठमाडौँद्वारा बिस्तार प्रक्रिया अघि बढ्ने छ । यसपछिको कुन्छाल–चित्लाङ खण्ड सडक डिभिजन हेटौँडाले ठेक्का आह्वान गरेको हो ।सुवेदीले भने, ‘यस खण्ड अन्तर्गत् करिब ५ किलोमिटर सडक विस्तार गरिने छ । काठमाडौँ सकिने बित्तिकै मकवानपुरको सिमाना सुरु हुने बिन्दुदेखि चित्लाङतर्फको करिब १२ देखि १३ सय मिटर खण्डमा नयाँ कालोपत्रे गरिनेछ ।’

यस्तै, त्रिभुवन राजपथसँग जोडिने कुन्छालदेखि चित्लाङतर्फ आउने बाटोको विभिन्न खण्डहरूमा गरी थप ३४ सय मिटर सडक कालोपत्र गरिने उनको भनाइ छ । ‘कुन्छालदेखि चित्लाङसम्मको बाटोभित्र विभिन्न ठाउँमा पिच गर्ने र केही ठाउँमा ढलान गर्ने योजना छ,’ सुवेदीले भने, ‘बस्ती भएका र विगतमा काम हुन बाँकी रहेका करिब ३ देखि ४ सय मिटर क्षेत्रमा भने आरसीसी ढलान गरिनेछ ।’ सडक दुई लेनकै रहने र हाल उपलब्ध चौडाइ पर्याप्त रहेकाले यसपटक सडकको सतह सुधारमा केन्द्रित हुने गरी सडक डिभिजन हेटौंडाले ठेक्का आह्वान गरेको छ ।

डिभिजन कार्यालयले सार्वजनिक गरेको सूचनाअनुसार ठेक्का नम्बर आरडीएचटीडी ३३७०११६९÷२०८२÷०८३–४३ मार्फत् योग्य निर्माण व्यवसायीहरूबाट सिलबन्दी बोलपत्र माग गरिएको छ । यस आयोजनामा सहभागी हुन चाहने व्यवसायीले १० हजार रुपैयाँ दस्तुर तिरेर बोलपत्र फारम भर्न सक्नेछन् भने धरौटी रकम वापत ४६ लाख रुपैयाँ राष्ट्र बैंक वा तोकिएको बैंक खातामा जम्मा गर्नुपर्नेछ ।सूचनाअनुसार इच्छुक फर्महरूले सार्वजनिक खरिद अनुगमन कार्यालय (पीपीएमओ) को वेबसाइट मार्फत् विद्युतीय माध्यमबाट मात्र आवेदन दिन सक्ने व्यवस्था गरिएको छ । बोलपत्र पूर्वको बैठक आगामी २०८३ वैशाख २४ गते बिहान ११ बजे बस्नेछ भने जेठ ४ गते दिउँसो १२ बजेसम्म आवेदन दिने अन्तिम समय तोकिएको छ । सोही दिन दिउँसो १ बजे बोलपत्र खोलिनेछ ।यस खण्ड बिस्तारको ठेक्का प्रक्रियाका लागि ३१ दिनको म्याद दिइएको छ । बोलपत्र पेस भएपछि प्राविधिक र आर्थिक मूल्याड्ढनको चरण पार गरेर निर्माण व्यवसायी छनौट गरिनेछ ।

‘हाम्रो मुख्य लक्ष्य चालू आर्थिक वर्षभित्रै निर्माण व्यवसायीसँग सम्झौता गरिसक्ने रहेको छ,’ सुवेदीले भने, ‘हाम्रो प्राथमिकता सुरुमा प्राविधिक मूल्याड्ढन र आर्थिक मूल्याड्ढन गरी योग्य व्यवसायी छनौट गर्ने हो,’ सुवेदीले थपे, ‘सम्झौता भएपछि निर्माण कार्यले गति लिनेछ ।’ लामो समयदेखि स्तरोन्नतिका लागि प्रतिक्षा गरिएको यो सडक खण्डको काम चालु आर्थिक वर्षकै बजेटबाट सुरु गर्न लागिएको हो ।यो खण्ड विस्तारका लागि चालु वर्ष नै बजेट विनियोजन भएको थियो । तर, स्तरोन्नतिका लागि प्रक्रिया भर्खरै थालिएको हो । यस चालु आर्थिक वर्षबाटै सुरुगरिने यो खण्ड सम्झौता भएपछि निर्माण कार्यले गति लिने विश्वास गरिएको छ ।

चित्लाङ–कुन्छाल सडक खण्ड राजधानी काठमाडौँ छिर्ने वैकल्पिक र छोटो मार्गका रूपमा परिचित छ । यो सडकको स्तरोन्नति सम्पन्न भएपछि मकवानपुरको उत्तरी भेगका बासिन्दालाई काठमाडौँ आउजाउ गर्न निकै सहज हुनेछ । विशेषगरी ऐतिहासिक र पर्यटकीय स्थल चित्लाङमा आन्तरिक तथा बाह्य पर्यटकको आवागमन बढ्ने र स्थानीय उत्पादनलाई बजारसम्म पु¥याउन ठूलो मद्दत पुग्ने अपेक्षा गरिएको छ । विगतमा सडकको दयनीय अवस्थाका कारण सास्ती खेपिरहेका स्थानीय र पर्यटकका लागि यो स्तरोन्नति आयोजनाले ठूलो राहत दिने विश्वास लिइएको छ ।