अतिक्रमण गरी बनाइएका संरचना हटाउन सार्वजनिक सूचना जारी
हेटौंडा- हेटौंडास्थित प्राकृतिक जलाशय मत्स्य प्रवद्र्धन एवं संरक्षण केन्द्रले आफ्नो स्वामित्वको जग्गा अतिक्रमण गरी बनाइएका संरचना हटाउन सार्वजनिक सूचना जारी गरेको छ । केन्द्रले तेस्रोपटक सूचना प्रकाशित गर्दै ७ दिनभित्र अतिक्रमित करिब ४ कठ्ठा क्षेत्रफल खाली गर्न निर्देशन दिएको हो । हेटौंडा उपमहानगरपालिका–५ मा रहेको केन्द्रको नाममा दर्ता भएको कित्ता नम्बर ९६ को जग्गामा केही व्यक्तिहरुले अनधिकृत रुपमा घर, टहरा, होटल, रेष्टुरेन्ट लगायतका संरचना निर्माण गरेको जनाइएको छ ।
उक्त जग्गा माछाको आहारा व्यवस्थापनका लागि केरा, मकै, भटमासका साथै उन्नत्र घाँसहरु नेपीयर, सुडान, बदामे, परा, ढैंचालगायतको लगाउनुपर्ने भएकाले संरचना हटाउन लागिएको केन्द्रले जनाएको छ । वरिष्ठ मत्स्य विकास अधिकृत सरोजकुमार यादवद्वारा जारी सूचनामा जग्गा हाल भोगचलन गर्नेहरु ६ जनाको नामसमेत उल्लेख गरिएको छ ।
