हेटौंडास्थित प्राधिकरणको केन्द्रीय वर्कशपमा आगलागी
हेटौंडा- नेपाल विद्युत प्राधिकरणको हेटौंडास्थित केन्द्रीय वर्कशपमा भिषण आगलागी भएको छ । बुधबारराति वकर्शपको पुरानो सामानराख्ने गोदाममा आगलागी भएको वडा प्रहरी कार्यालय हेटौंडाले जानकारी दिएको छ ।केन्द्रीय वर्कशपमा प्राधिकरणको ट्रान्समिटर सम्बन्धी कार्य हुने गरेको छ । वडा प्रहरी कार्यालयका प्रहरी निरीक्षक प्रज्वल थपलियाले आगलागीकोकारण खुल्न नसकेको बताउँदै बारुणयन्त्रको सहयोगमा आगो निभाउने प्रयास भइरहेको जानकारी दिए ।
केन्द्रीय वर्कशपमा यसअघि दुईपटक भिषण आगलागी भएको थियो । ११ वैशाख २०७१ मा लागेको आगलागी दमकलको प्रयोगबाट पनि नियन्त्रणमा लिन नसक्दा डोजरले भवनको पर्खाल भत्काएर नियन्त्रणमा लिइएको थियो । १२ माघ २०७९ मा आगलागी हुँदा तारलगायतका विद्युतीय सामग्री जलेर नष्ट भएका थिए ।
