मकवानपुरे स्रष्टा बर्तौलाको ‘उज्यालोका बाछिट्टा’ को विमर्श
हेटौंडा- मकवानपुरका स्रस्टा डीबी बर्तौलाको मुक्तकसंग्रह ‘उज्यालोका बाछिट्टा’ को विमर्श गरिएको छ । सम्पूर्ण किताब नारायणगढले आयोजना गरेको कार्यक्रममा बर्तौलाको मुक्तक संग्रहका बारेमा समालोचक उदय अधिकारीले समीक्षात्मक टिप्पणी राखेका थिए । कार्यक्रममा रमेश प्रभातले स्वागत मन्तव्य राख्दै बर्तौलाले मुक्तकलेखनमा आफूलाई निरन्तर समाहित गरेर सफलता प्राप्त गरेको बताएका छन् । समालोचक अधिकारीले बर्तौलाका मुक्तकहरु चोटिला, व्यङग्यात्मक र सरल भएका बताए ।
कार्यक्रममा बर्तौलाले २० भन्दा धेरै मुक्तक सुनाएका थिए । कार्यक्रममा सहभागी हुन बर्तौलासँगै साहित्य संगम मकवानपुरका उपाध्यक्ष सानू खनाल, मुक्तक मञ्च मकवानपुर सचिव सुवास सजल, गजल मञ्च मकवानपुर सचिव कमल नेपाल, मुक्तक मञ्च मकवानपुर कोषाध्यक्ष मिथिला अधिकारी, नवसर्जक साहित्य चौतारीकी केन्द्रीय महासचिव स्वस्तिका दाहाल, मुक्तक मञ्च मकवानपुरकी सहसचिव स्वस्तिका बानियाँ, मुक्तक मञ्च मकवानपुर पूर्वसचिव गोकर्ण लामाक्स, नवसर्जक साहित्य चौतारीकी केन्द्रीय सदस्य विविशा रुम्बा, अग्रज स्रस्टा मुना अर्याल लगायतको आतिथ्यता रहेको थियो ।
मुक्तकवाचनका क्रममा स्रस्टा बर्तैलाले चितवन र मकवानपुरको एकता र मित्रता दिगोरुपमा आएको बताए । चितवनको साहित्यिक संस्कार लोभलाग्दो भएको बताउँदै बर्तौलाले भने, ‘चितवनबाट सिक्नु पर्ने धेरै कुरा छन् । यहाँको सम्पूर्ण किताब व्यावसायिक मात्र नभई भाषासाहित्यका लागि महत्वपूर्ण कार्य गर्दै आएको र चितवनबाट अग्रज, समकालीन र अनुजलाई मिलाउने संस्कार अनुकरणीय छ ।’
