महामारीमा सञ्चालित निजी विद्यालयलाई कारबाहीको चेतावनी
काठमाडौं- महानगरपालिकाकाले महामारी तीव्र रूपमा बढिरहेका बेला केही निजी विद्यालय सञ्चालन भइरहेको भन्दै कारवाही गर्ने चेतावनी दिएको छ। शिक्षा, विज्ञान तथा प्रविधि मन्त्रालयको निर्णयविपरीत महानगरपालिकाका केही निजी विद्यालय सञ्चालन भइरहेका छन्।
कोरोना भाइरसको तेस्रो लहर तीव्र रूपमा बढिरहेको भन्दै सरकारले २७ पुसदेखि सबै विद्यालय भौतिक उपस्थितिमा सञ्चालन नगरी वैकल्पिक माध्ययमबाट सञ्चालन गर्न निर्देशन दिएको थियो। सरकारले दिएको निर्देशनको बेवास्ता गरी महानगरपालिकाका वडा नम्बर १५ र १८ का केही निजी विद्यालय सञ्चालन भइरहेका छन्। कामपा–१५ मा सञ्चालित फ्युचरस्टार बोर्डिङ स्कुलले बिहान र दिउँसो दुई समूहमा पठनपाठन गरिरहेको छ। यस्तै, कामपाकै घना बस्ती रहेका अन्य केही वडामा पनि विद्यालय सञ्चालन भइरहेका छन्।
यस सन्दर्भमा महानगरपालिकाका शिक्षा विभाग प्रमुख रामप्रसाद सुवेदीले सरकारले जारी गरेको निर्देशनविपरीत सञ्चालन भएका विद्यालय तत्काल बन्द नगरे कारवाही गर्ने चेतावनी दिएका छन्। सुवेदीले भने, ‘महामारी नियन्त्रणका लागि सबैले साथ र सहयोग गर्नुपर्ने समयमा निर्देशनविपरीत शुल्क लिने बहानामा विद्यालय सञ्चालन गर्नु दण्डनीय छ।’
अहिले पनि सबै विद्यार्थीमा खोपको पहुँच पुगेको छैन। १२ वर्ष उमेर पुगेका विद्यार्थीले लगाए पनि अझै धेरैले खोप लगाउन बाँकी छ। ‘महामारी बढिरहेको समयमा विद्यालय खोल्नु घातक छ, यो तत्काल रोक्नुपर्छ, अन्यथा कडा कारवाही हुन्छ,’ सुवेदीले भने, ‘सरकारले भौतिक रूपमा मात्रै विद्यालय सञ्चालन नगर्न भनेको हो, यसअघिझै अनलाइनका माध्ययमबाट विद्यालय सञ्चालन गर्न सकिन्छ।’
अहिले काठमाडौँ उपत्यका महामारीको केन्द्र बनेको छ। यहाँ दैनिक सात हजार संक्रमित देखिन थालेका छन्। महामारी नियन्त्रण गर्न भन्दै लोकसेवा आयोग र त्रिभुवन विश्वविद्यालयले सञ्चालन गर्ने परीक्षासमेत स्थगन गरिसकेका छन्। यातायातका साधनमा जोर–बिजोर प्रणली लागू गरिएको छ। पछिल्ला केही दिनयता देशभर दैनिक १२ हजारभन्दा बढी कारोना संक्रमित थपिइरहेका छन्।(रासस)
