जिल्लास्तरीय भलिबलको उपाधि तमु बहुउद्देश्यीयलाई
हेटौंडा- बिनयबाबु बस्नेत स्मृति प्रतिष्ठान थाहा–२ को आयोजनामा संचालित आठौं संस्करणको मकवानपुर जिल्ला स्तरीय पुरुष भलिबल प्रतियोगिताको उपाधि तमु बहुउद्देश्यीय थाहा–५ ले जितेको छ । थाहा नगरपालिका–२ स्थित खेलमैदानमा भएको प्रतियोगिताको फाईनलमा तमु बहुउद्देश्यीयले आयोजक बिनयबाबु बस्नेत स्मृति प्रतिष्ठान थाहा–२ लाई २५–२३, २५–२० २५–२३ को सोझो सेटमा पराजित गरी उपाधि जितेको हो ।
उपाधिसँगै तमु बहुउद्देश्यीयले नगद ५५ हजार ५ सय ५५ रुपैयाँ, शिल्ड, मेडल र प्रमाणपत्र प्राप्त गरेको छ । त्यस्तै उपबिजेता बिनयबाबु स्मृति प्रतिष्ठानले नगद २८ हजार ८ सय ८८ रुपैयाँ, शिल्ड, मेडल र प्रमाणपत्र प्राप्त गरेको छ । तृतीय भएको मङलेश्वर युवा क्लवले नगद ११ हजार १ सय ११ रुपैयाँ सहित शिल्ड, मेडल र प्रमाणपत्र प्राप्त गरेको छ ।
तृतीय भएको मङलेश्वर युवा क्लव पछिल्लो दुई संस्करणको बिजेता हो । कात्तिक २ गतेदेखि सुरु भएको प्रतियोगितामा १२ टिमको सहभागिता रहेको थियो । प्रतियोगितामा उत्कृष्ट खेलाडी तमु बहुउद्देश्यीयका पुजन गुरुङ, उत्कृष्ट ब्लकर तमुका बिबेक माझी, उत्कृष्ट डिफेन्डर तमुका पुकार गुरुङ, उत्कृष्ट स्पाइकर बिनयबाबु बस्नेत स्मृति प्रतिष्ठानका सुजल कार्की, बेष्ट सर्भर तमुका निश्चल रानामगर र उत्कृष्ट सेटर बिनयबाबु बस्नेत स्मृति प्रतिष्ठानका प्रजिब बलामी र उत्कृष्ट नवप्रतिभा खेलाडी उन्युचौरका आशिष थिङ भएका थिए । उत्कृष्ट खेलाडीलाई नगदसहित मेडल र ट्रफी प्रदान गरिएको थियो । बिजेता खेलाडी तथा बिधागत उत्कृष्ट खेलाडीलाई थाहा नगरप्रमुख बिष्णु बिष्टले पुरस्कार प्रदान गरेका थिए ।
प्रतिष्ठानका अध्यक्ष शंकर कार्कीको अध्यक्षता एवम् थाहा नगरपालिकाका नगरप्रमुख बिष्टको प्रमुख आतिथ्यतामा सम्पन्न समारोहमा थाहा नगरपालिका–२ का वडाअध्यक्ष बमबहादुर सिङतान, थाहानगर खेलकुद विकास समितिका संयोजक टीकाराम स्याङ्तान, नगर खेलकुद विकास समितिका पूर्वसंयोजक राजेश केसी, विनयबाबु बस्नेतका बुबा बिष्णुबहादुर बस्नेत लगायतको आतिथ्यता रहेको थियो । सशस्त्र प्रहरीमा कार्यरत भलिबल खेलमा सक्रिय बिनयबाबु बस्नेत सडक दुर्घटनामा परी २०७२ सालमा निधन भएपछि उनको स्मृतिमा २०७४ सालबाट रनिङ शिल्ड भलिबल प्रतियोगिता शुरु गरिएको प्रतिष्ठानका सचिव विकेसबाबु बस्नेतले बताए ।
