‘मेरो योजनालाई कार्यान्वयन गर्ने मौका दिनुहोस्’

प्रमोदसिंह रानाभाट अध्यक्ष पदका उमेद्वार मकवानपुर उद्योग वाणिज्य संघ

मकवानपुर उद्योग वाणिज्य संघको यही पुस २७ गते हुन लागेको निर्वाचनलाई लक्षित गर्दै, संघको नेतृत्व लिने तयारीमा रहेका अध्यक्षका उमेद्वार प्रमोदसिंह रानाभाटसँग साझाकुरा दैनिकका लागि गरिएको कुराकानीको सम्पादित अंश ।

सम्बाददाता: संघको नेतृत्वको दौडमा तपाईंको उम्मेदवारी धेरैका लागि चासोको विषय भएको छ । तपाईंको दृष्टिकोण, योजना र अनुभवबारे कुरा गरौं । तपाईंको उम्मेदवारीको प्रमुख उद्देश्य के हो र संघलाई तपाईं कसरी बदल्न चाहनुहुन्छ ?

रानाभाटः मकवानपुर उद्योग वाणिज्य संघ केवल एउटा ब्यवसायिक संस्था मात्र नभएर यस क्षेत्रका समाज र व्यवसायीको आवाज हो । मेरो उमेद्वारीको प्रमुख उद्देश्य भनेको यस संघलाई एकीकृत बनाउँदै व्यवसायीको समस्याको समाधान गर्ने एउटा बलियो संस्थाको रुपमा स्थापित गर्नु हो । म संघलाई पारदर्शी, उत्तरदायी र व्यवसायीक सहजीकरणमा अगाडि ल्याउन चाहन्छु । यसलाई डिजिटलाइजेसन, समावेशी नीति र सहजीकरणमार्फत प्रभावकारी बनाउने मेरो योजना छ । बिगतका दिनमा संघले निजी क्षेत्रको प्रतिनिधित्व गरी सरकारसँग सहकार्य गर्दै आएको थियो । यसलाई अझै प्रभावकारी बनाउनु जरुरी छ ।

सम्बाददाताः यो डिजिटाइजेसन र सहजीकरणको कुरा निकै प्रभावकारी लाग्यो । तपाईंको नेतृत्वमा संघलाई कसरी डिजिटल प्रणालीमा लैजाने योजना छ ?
रानाभाटः बर्तमान समयमा प्रबिधिमैत्री जीवनपद्धतिको विकास हुनु जरुरी भइसकेको छ । आजको युगमा डिजिटल प्रणाली अनिवार्य बनिसकेको अवस्थामा संघका सबै सेवाप्रणालीलाई अनलाइन मार्फत् संचालनमा ल्याउने ब्यवस्था गराउनेछु । सदस्यता नवीकरणदेखि समस्या दर्ता र समाधान प्रक्रियासम्म सबै कुरा डिजिटल हुनेछ । यसले व्यवसायीले समय र स्रोत बचत गर्न सक्नेछन् । यस्तै, संघको आधिकारिक मोवाइल एप्लिकेशन पनि विकास गर्ने योजना छ, जसले सूचना, तालिमका अवसर र सरकारी नीति परिवर्तनसम्बन्धी खबर तुरुन्तै सदस्यसम्म पु¥याउनेछ ।

सम्बाददाताः मोवाइल एप्लिकेशन र डिजिटल प्रणालीको योजना राम्रो छ । तर, ग्रामीणक्षेत्रमा पहुँच नभएका व्यवसायीलाई यो प्रणालीले कसरी फाइदा पु¥याउँछ ?
रानाभाटः यो विषयमा पनि प्रबिधिलाई अधिकतम उपयोग नीति लिन सकिनेछ । ग्रामीण क्षेत्रमा पनि मोवाइल डाटा चलाएर हाम्रो एपमार्फत काम गर्ने वातावरण बनाउन सकिन्छ । हामी डिजिटल प्रणालीसँगै ग्रामीण पहुँचका लागि ‘मोवाइल सहजीकरण टोली’ खडा गर्नेछौं । यी टोलीले ग्रामीण व्यवसायीको समस्या सुन्ने, उनीहरुको तर्फबाट दर्ता गर्ने र समस्या समाधान गर्ने काम गर्नेछन् । यस्तो समन्वयले ग्रामीण व्यवसायीलाई थप सशक्त बनाउनेछ । प्रबिधिले ग्रामीण क्षेत्र र सहरी क्षेत्र भनेर छुट्याउँदैन ।

सम्बाददाताः मकवानपुरका व्यवसायीले यतिबेला भोगिरहेका प्रमुख चुनौती के छन् र तपाईंको दृष्टिकोणमा तिनलाई कसरी सम्बोधन गर्न सकिन्छ ?
रानाभाटः व्यवसायीले अहिले दुई ठूला समस्या सामना गरिरहेका छन् । पहिलो, कर प्रणालीको अनियमितता र दोहोरो करको समस्या । दोस्रो, बैंकिङ प्रणालीमा कडाइ र उच्च ब्याजदर । यी दुवै समस्या समाधानका लागि संघले सरकार र बैंकसँग प्रत्यक्ष समन्वय गर्नेछ । करका सम्बन्धमा संघको एउटा ‘सल्लाहकार मञ्च’ बनाउनेछौं, जसले व्यवसायीलाई कानुनी विषयमा सहजीकरण प्रदान गर्नेछ । बैंकिङ समस्याको समाधानका लागि सहुलियतपूर्ण कर्जा र ऋण पुनर्संरचनाको बहस गरी निष्कर्षमा पुग्न सकिन्छ । निजी क्षेत्र र सरकार हातेमालो गर्नुको बिकल्प पनि त छैन ।

सम्बाददाताः तपाईंले सरकारसँग समन्वयको कुरा गर्नुभयो । तर, के तपाईंको अनुभवले संघलाई यस्तो सरकारी समन्वयमा सक्षम बनाउनेछ ?
रानाभाटः म लामो समयदेखि संघ र विभिन्न वस्तुगत संघका सदस्यको रुपमा सक्रिय छु । सरकार र स्थानीय प्रशासनसँग मेरो अनुभव र समन्वय क्षमताले संघलाईप्रभावकारीरुपमा नेतृत्व गर्न सक्षम बनाउँछ । यसअघि, मैले करसम्बन्धी धेरै समस्या समाधान गर्न पहल गरेको छु । त्यही अनुभवलाई म अध्यक्षको भूमिकामा उपयोग गर्न चाहन्छु । निजी क्षेत्रका उद्योगी ब्यवसायीले पनि त सरकारलाई कुनैपनि रुपमा सहयोग गरिरहेका छन् । निजी क्षेत्रबिना सरकार कसरी संचालन गर्न सकिन्छ र ?

सम्बाददाताः तपाईंको अनुभवबारे चर्चा गर्दा, तपाईंको योग्यता र पृष्ठभूमि व्यवसायिक नेतृत्वका लागि कस्तो रहेको छ ?
रानाभाटः मैले व्यवसायिक नेतृत्वको क्षेत्रमा १५ वर्षभन्दा बढी समय बिताएको छु । ब्यवसायीको पक्षमा काम गर्न पनि त नेतृत्व पक्षको क्षमताको कुरा होलान । मेरो व्यवसायिक करिअरमा मैले साना व्यवसायबाट सुरु गर्दै औद्योगिक क्षेत्रमा पनि काम गरेको छु । यसबाहेक, म संघका विभिन्न समितिको सदस्य भएर नीतिनिर्माण प्रक्रियामा सहभागी भएको छु । यी सबै अनुभवले संघलाई अग्रगामी बनाउन मेरो नेतृत्वले मजबुत बनाउँछ ।

सम्बाददाताः तपाईंको नेतृत्वले संघको भाबि कार्यदिशामा के कस्ता परिवर्तन ल्याउन सक्छ ?

रानाभाटः मेरो नेतृत्व समावेशी र नतिजा–केन्द्रित हुनेछ । म केवल समस्याको पहिचानमात्र होइन, तिनको समाधानमा तत्काल कदम चाल्न चाहन्छु । मेरो फरक क्षमतामा व्यवसायीको आवाजलाई प्राथमिकता दिनसक्ने सामथ्र्य र पारदर्शिता ल्याउने प्रतिबद्धता समावेश छ । संघका अग्रजहरुसँगको परामर्श, सरसल्लाहले संघको गतिबिधिलाई अगाडि बढाउन सकिन्छ ।

सम्बाददाताः अब तपाईंको टिमबारे कुरा गरौं । तपाईंले आफ्नो टिम पनि सार्वजनिक गर्नुभएको छ । यो टीमको सामूहिक बल र योगदान के हो ?
रानाभाटः मेरो टिम व्यवसायका विभिन्न क्षेत्रबाट आएका योग्य र अनुभवी सदस्यको संयोजन हो । कोषाध्यक्ष, महासचिव, उपाध्यक्षजस्ता हरेक सदस्यको भूमिका स्पष्ट छ । हाम्रा सदस्यको अनुभव र उत्साहले हामीलाई संघको लक्ष्य प्राप्त गर्न बलियो बनाउनेछ । विशेष गरी, महिलाको सहभागिता र युवा सदस्यको उत्साह हाम्रो टिमको प्रमुख बल हो ।

सम्बाददाताः तपाईंको टीमले महिलाको सहभागितालाई प्राथमिकता दिएको देखिन्छ । महिलाको भूमिकालाई संघमा कसरी सशक्त बनाउने योजना छ ?
रानाभाटः ब्यापारब्यवसायमा महिलाहरु निकै सक्षम छन् । बिगतमा महिला घरभित्र मात्रै सीमित हुनुपर्छ भन्ने सोचाई भएका मानिमा पनि हिजोआज परिवर्तन आएको छ महिला व्यवसायीको सीपविकास र उनीहरुको पहिचानलाई बलियो बनाउन ‘महिला उद्यमशीलता कोष’ स्थापना गर्ने योजना छ । यसबाट महिलालाई वित्तीय सहयोग, तालिम र बजार पहुँच दिलाउनेछौं । साथै, महिलाको समस्या सुनाउने ‘महिला समन्वय समिति’ पनि बनाउनेछौं ।

सम्बाददाताः अन्त्यमा, मकवानपुरका व्यवसायीसमक्ष तपाईंको केही सन्देश राख्नु पर्नेछ ?
रानाभाटः मकवानपुरलाई आर्थिकरुपमा बलियो बनाउनु हाम्रो सबैको साझा लक्ष्य हो । म, मेरो टिम र मेरो योजनाले व्यवसायिक विकासका लागि प्रतिबद्ध छु । यो संघ व्यवसायीको मात्र होइन, सम्पूर्ण मकवानपुरको भविष्य हो । त्यसैले, मलाई र मेरो टिमलाई मतदान गरेर हाम्रो योजनालाई कार्यान्वयन गर्ने मौका दिनुहोस् । म तपाईंहरुको विश्वासलाई कहिल्यै तोड्ने छैन । ब्यवसायी मतदाताले बिबेक प्रयोग गर्नुहुनेछ भन्ने कुरामा म र सि· टिम आशाबादी छ ।