श्यामकुमारले ल्याए नयाँ स्वदेशगान
हेटौंडा- हेटौंडाका साहित्यकार श्यामकुमार बानियाँद्वारा रचित स्वदेशगान ‘यो देशले तिम्रो काँध मागेको छ’ को म्युजिक भिडियो सार्वजनिक भएको छ । आइतबार सर्वश्री मिडियाको युट्युब च्यानलमार्फत् म्युजिक भिडियो सार्वजनिक गरिएको हो ।गीतमा नवराज पराजुलीको स्वर र ओमप्रकाश राईको संगीत रहेको छ । यस्तै रामकृष्ण थापाले संगीत संयोजन गरेका छन् ।
म्युजिक भिडियोको छायांकन तथा सम्पादन हेटौंडाका फोटो पत्रकार महेन्द्र ओझाले गरेका हुन् । लामो समयदेखि मकवानपुरमा रहेर साहित्य रचना गर्दै आएका बानियाँले यसअघि दुईवटा स्वदेशगानसहित पाँचवटा गीतका म्युजिक भिडियो ल्याइसकेका छन् ।
बानियाँका ‘आकाश खुल्यो सुस्तरी’ र ‘हिमालमा घाम झुल्क्यो’ बोलका स्वदेशगान २०८० फागुनमा सार्वजनिक भएका थिए । गायनमा समेत रुची राख्ने बानियाँले ‘आकाश खुल्यो सुस्तरी’ आफ्नै स्वरमा रेकर्ड गराएका थिए । यस्तै उनको आवाजमा ‘शून्य शून्य’ र ‘माया भन्नु’ बोलको गीतका म्युजिक भिडियो गत असोजमा सार्वजनिक भएका थिए ।
