थाहा फिल्म फेस्टिभल हुने
हेटौंडा-‘थाहा फिल्म फेस्टिभल’ को दोस्रो संस्करण आयोजना हुने भएको छ । मकवानपुरको थाहा नगरपालिकामा पुस २८ गतेबाट सुरु हुने महोत्सव माघ १ गतेसम्म चल्नेछ ।तीनदिने फेस्टिभलमा सर्ट फिल्म, फिचर फिल्म र डकुमेन्ट्री सहित जम्मा २० फिल्म प्रदर्शन गरिनेछन् । महोत्सवमा सहभागिताका लागि पेस भएका ४६ फिल्ममध्येबाट जम्मा २० फिल्म छानिएको आयोजक थाहा कला केन्द्रले जनाएको हो । थाहा नगरपालिकास्थित बज्रबाराहीमा आयोजना हुने यस महोत्सवमा पखेटा, टुल्की, बाटो, लाखे, सतिदेवी, मोदीवेनी लगायत फिचर फिल्म प्रदर्शन हुनेछन् । सर्ट फिल्मतर्फ बेली, अन्तवार्ता, द रोप अफ होप, निर्देश, दुई सय रुपैयाँ, खिल लगायत छन् ।
डकुमेन्ट्रीतर्फ हिउँ चितुवा, गल्र्स रिराइटिङ डेस्टिनी लगायत रहेका छन् । महोत्सवमा फिल्म प्रदर्शनीसँगै ‘फिल्म समीक्षा’ र ‘नेपाली सिनेमाको विविधता’ जस्ता समसामयिक विषयमाथि छलफल हुँदैछ । पर्यटकीय गन्तव्यका रुपमा परिचित र सांस्कृतिकरुपमा पनि धनी थाहा नगरपालिका फिल्म छायांकनका लागि रोजाइमा पर्ने थलो हो । पर्यटनका लागि चलचित्र नारासहित आयोजना हुँदै आएको यस महोत्सवले फिल्ममार्फत् आन्तरिक पर्यटनलाई जोड्ने लक्ष्यसमेत लिइएको छ ।
महोत्सव संयोजक प्रमोदकृष्ण जोशी भन्छन्, ‘काठमाडौँ र हेटौंडाजस्ता सहरको नजिकै रहेर पनि थाहा नगरपालिकामा हालसम्म कुनै सिनेमा हल सञ्चालनमा छैन । त्यसकारण सहजै सिनेमा हेर्न नपाउने यहाँका दर्शकलाई लक्षित गरी यो महोत्सव आयोजना गरिएको हो ।’ उनी थप्छन्,–‘फिल्म हेर्ने बहानामा आन्तरिक पर्यटन पनि फस्टाओस् भन्ने हाम्रो उद्देश्य हो ।’ थाहा कलाकेन्द्रको आयोजनामा हुन लागेको थाहा फिल्म फेस्टिभलको लागि संस्कृति तथा पर्यटन मन्त्रालय बागमती प्रदेशले सहकार्य र नेपाल पर्यटन बोर्डले सहयोग गरेको छ ।
